أسئلة انترفيو مبيعات و إجاباتها
- هناك اسئلة تعرض من الHR و هي اما تنجح فيها وتعدي منها وتدخل بعدها علي مدير المبيعات واما لاقدر الله تفشل ويقول لك هنبقي نتصل بيك.
- اسئلة الHR بتبقي عادية او استفزازية او غامضة علي حسب شخصية اللي بيعمل معاك الانترفيو ممكن يكون رجل هادي او عصبي المزاج او طيب او شديد وانت هتعرف من الكلام معاه.
- متحاولش تتكلم كتير بدون سبب الا لما يسالك وتجاوب علي اد السؤال ومتتفزلكش ومتكدبش.
دي بعض الاسئلة المهمة إللى لازم تبقوا عارفين ازاي تردوا و تجاوبوا عليها
تعرف إيه عن السيلز ( المبيعات يعنى ) ؟
هي المهنة التي يقوم أصحابها بمحاولة بيع المنتج أو الخدمة من خلال عرضها على الفئات المحتملة .. وأقصد بالأخيرة تلك المجموعات التي يتوقع شرائها لما يعرضه رجل لمبيعات ..
إيه الفرق بين السيلز و التلى سيلز ؟
السيلز عرفناها بالأعلى.
التلى سيلز: هى عباره عن مبيعات بس عن طريق التليفون عن طريق انك بتكلم ارقام تليفونات و تحاول تعرف اللى بيرد عليك بمنتج الشركه و مزاياه عشان تقدر تعمل عمليه بيبعيه عن طريق التليفون.
إيه الفرق بين السيلز إن دوور و السيلز أوتدوور ؟
السيلز إن دوور: هى المبيعات داخل مقر بيعى ثابت يعنى انك بتبقى قاعد فى مكان تبيع فيه منتج الشركه سواء كان الفرع الرئيسى للشركه او احد المراكز او الفروع التابعه ليها.
السيلز اوت دوور: هى مبيعات خارج الشركه يعنى انت بتبقى فى الشارع بتلف و تحاول تبيع منتج الشركه.
و مش شرط انك تكون بتلف فى الشارع على رجليك لان فيه بعض الشركات بتوفرلك عربيه بسواقها سواء كانت نقل او ملاكى عشان تقدر تلف و تبيع منتجات الشركه.
إيه الفرق بين السيلز و الماركتينج ( التسويق ) ؟
التسويق: هي المهنة التي يقوم أصحابها بابتكار الأفكار و اعداد الخطط والتوقعات لمنتج معين أو خدمة ما لتكوين مايسمى بالفرصة البيعية و التسويق يسعاد المنتج بدرجة كبيرة على بيع نفسه بكون العمليات التسويقية هي التي تساعد على خلق هوية المنتج أو الخدمة.
السيلز: هي المهنة التي يقوم أصحابها بمحاولة بيع المنتج أو الخدمة من خلال عرضها على الفئات المحتملة .. وأقصد بالأخيرة تلك المجموعات التي يتوقع شرائها لما يعرضه رجل لمبيعات ..
إيه الفرق بين الماركتينج و التلى ماركتينج ؟
الماركتينج: تم الاجابة عليه بالأعلى.
التلى ماركتينج: تسويق عن طريق التليفون , زيه زى المبيعات عن طريق التليفون بس الفرق بين الإتنين الهدف بتاعهم , لان التلى سيلز هدفه الأساسى تعريف الناس بالمنتج او الخدمه و معرفة رغبة الناس فى المنتج و لا يشرط البيع من خلال المكالمه.
إيه الفرق بين التلى ماركتنج و التلى سيلز ؟
تم الاجابة عليه بالأعلى.
بيعلى القلم ده 100 جنيه او ورينى إزاى هاتبيعلى الموبايل ده ؟
- طبعاً بتظهر ان منتجك كله مزايا
- و تخلط فى طريقة كلامك بين نغمات الصوت المختلفه
- و تعلى صوتك فى حته من الكلام كنوع من التشويق و حذب الإنتباه
- و تحاول تعيد كلامك المرتبط بمزايا المنتج
- و فى الاخر تشوق الناس لسعر منتجك و تسألهم عارفين كل ده بكاااام ؟ او انك تقولهم و سعر منتجنا ب كـذااا بــس
- و تقوم قايل يعنى هاتقدر تعمل كذا و كذا و كذا ( المزايا اللى قولتها ) بمنتجنا ( و تسمى إسم منتجك ) بكذا جنيه بـــس
إقنعنى ان التدخين مفيد ؟!
إقنعنى ان عمل المرأه مفيد اكتر من عمل الرجل ؟!
والسؤالين دول عشان يشوف قدرتك على الإقناع حتى فى الحاجات اللى انت مش مقتنع بيها أصلاً، لانك من الممكن انك تبيع منتج او خدمه انت اصلاً مش عاجباك و مش مقتنع بيها بس لازم تقنع بيها العميل بتاعك)
بتبدا يومك الساعة كام ؟؟
المقصود عاوز يعرف انت بتصحي بدري ونشيط ولا كسلان
بتفضل تشتغل كام ساعة ؟؟
طبعا لان انت مقدم علي وظيفة مندوب فمتذكرش اي وقت محدد متتفزلكش وتقول له 8 ساعات كده يبقي انت باي باي لان وظيفة المندوب مش مقيدة بوقت فتقوله اخلص شغلي بانتهاء العمل المكلف بيه و مابحبش ان أربط نفسى بساعات عمل محدده لان ممكن الشغل المطلوب منى يحتاج مده اكبر من ساعات العمل و انا اهم حاجه عندى انى أخلص الشغل المطلوب منى.
لو زميلك في العمل بيعمل زيارات مضروبه يعني بيروح مشاوير شخصيه ليه هو او بيروح ينام فى بيته و بيقول لرئيسه في التليفون انه عند التاجر الفلاني او عند عميل جديد بيتفق معاه على شغل هتعمل ايه ؟؟
ترد عليه و تقوله هنصحه مرة و اتنين واقوله ان يحلل المرتب اللي بيقبضه و انه كده بيعطل مصلحة الشغل وانه لو استمر في عمل المقابلات المزيفه دى انا هبلغ رئيسي المباشرو لو ماستجبش هابلغ رئيسى علي طول.
لو رحت لتاجر و لقيته عامل نفسه بيتكلم في التليفون و مشغول و مش عاوز يكلمك و لا يرد عليك هتعمل ايه ؟؟
- هاتقوله هجيله وقت تاني يكون مزاجه كويس.
- هيرد يقوللك افرض انك رحت مرة و اتنين و عشرة و برده رافض يرد عليك تقوله ساعتها هبلغ مديري المباشر و هقوله اللي حصل و هو اكيد بخبرته هيفيدني و يقول لي اتصرف ازاي.
لو رحت لتاجر و هو ميعرفش اصلاً اي حاجة و قال لك يا عم بضاعتكم تعبانه و منتجكم اي كلام وهو اصلاً ميعرفش المنتج بتاع الشركة و لا عمرة شافه هتعمل ايه ؟؟
- هاتحاول تعرف هو بيقول كده بناءاً على ايه
- و تعرف منه هل فيه حد اشتكي من منتج من منتجات الشركه ولا ايه
- و لو فيه شكوى تقوله إنك مهتم جداً انك تعرفها فى اى منتج بالظبط و إيه هى عشان احنا فى الشركه مهتمين جداً برأى العميل عشان بيساعدنا فى التطوير و التحسين المستمر لمنتجاتنا عن طريق اننا بنحاول نحل و نتغلب على اى مشكله فى المنتج عشان نحوز على رضاء العميل و يكون راضى عن الشركه و منتجاتها و طبيعى ان رضائه ده هاينعكس على التاجر اللى بيبيع منتجات الشركه بتاعتنا
- و تحاول تشرح له المنتج كويس
- و تذكر له جميع مميزات الشركة
- و العروض و الخصومات
- و جودة المنتج
- و تديله كام مثال ان التاجر الفلاني اخد منكم و التاجر الفلاني شغال عليه من فترة و ان محدش من العملاء اشتكي و ممكن حضرتك تاخد كمية صغيرة تكون بداية موفقه و تسمع معاك و تطلب بعد كده طلبيات كتيرة و لو عايز تجرب عشان تتأكد من صدق كلامى فانا تحت امرك و تقدر تعتبر الشركه شركتك
اكبر مبلغ شيلته كان كام ؟؟
- هو عايز عاوز يعرف انت تقدر تتحمل مسئولية انك تشيل فلوس كتيرة و لا ايه نظامك و بتخاف من المبالغ الكبيرة لانك كمندوب ممكن تشيل فلوس بمبالغ.
- فهاتقوله طالما الواحد عنده ثقه في نفسه و أمانه و مركز فى مسئولية الحاجه اللى معاه و عنده شجاعة للحفاظ عليها ممكن يتحمل مسئولية اي حاجة.
- و طالما انا اتحملت مسئولية توزيع و بيع منتجات الشركة فاكيد هقدر اتحمل مسئولية جمع مبالغ البيع.
نصايح على السريع كدة:
- متحولش تلف وتدور وتكدب لان اللي قدامك هيعرف هيعرف وخاصة في مجال المبيعات خليك صريح وجريئ و متتكسفش من اي حاجة فاللي قدامك زيك بالظبط بني آدم.
- ممكن تدخل تعمل انترفيو تلاقي ادامك 3 اشخاص مدير المبيعات و مدير الموارد و مدير الشركة.
- اوعي تخاف ولا يجيلك رهبة و اعتبر نفسك داخل كافيتريا و لاقيت فيها واحد صاحبك و قاعد معاه ناس متعرفهمش و اتعامل عادي و حط في دماغك اني عاوز اثبت نفسي قدام نفسي و اثبت لنفسي اني بعرف اتكلم و اتعامل مع الناس.
- لما بتخاف و تتلجلج مبتعرفش تجاوب عن اي سؤال فامتحطش في دماغك اني ممكن اجاوب غلط لا لا لا متخليش في دماغك اي حاجة و متشغلش تفكيري هجاوب ازاي اتكلم عادي و بطبيعتك و متبصش في الارض لان محدش كاسر عينك ولا انت جاي تتسول منهم دا هما إللي عاوزينك بدليل انهم اتصلوا بيك عشان تيجي تعمل مقابلة معاهم فبص و ركز في عين اللي بيكلمك.
- عينه ايوة عينه لان هو خايف اصلاً ليفشل في المقابلة هو كمان .
مع الاسئلة دي لازم لازم تعرفوا الفرق بين التسويق و المبيعات و وظائف مندوبيهم من اللينك ده
http://blog.ewazefa.com/ar/home/Post/687
و دي أسئلة الأنترفيو الخاصة بالسيلز او التيلي سيلز واجابتها (الجزء الاول)
http://blog.ewazefa.com/ar/home/Post/425