أنت دلوقتي في بداية سنة جديدة في حياتك، بس في نفس الوقت عدت سنة من حياتك !
- اسأل نفسك: حققت إيه في السنة اللي فاتت ؟ إيه النجاح اللي حققته في حياتك لحد دلوقتى ؟ كمان إيه النجاح و الهدف اللي أنت مخطط له عشان تنجح السنة الجاية ؟
- اسأل نفسك اذا كنت فعلا سعيد عشان في سنة جديدة هتبتدي و أنت هتسعى عشان تنجز شىء جديد و هتحقق هدف فيها و لا بالنسبة لك سنة عادية هتيجي و هتعدي زي غيرها مش هتعرف تحقق فيها أي حاجة ؟
- خليك إيجابي في تفكيرك إقنع نفسك إنك سعيد لأن في سنة جديدة هتبتدي عشان أنت مخطط و مجهز أهداف حقيقية عايز توصلها و تنجح في حياتك و تحقق كل هدف من الاهداف دي في جميع مجالات حياتك.
- خليك فاكر إن أنت بس اللي ممكن تحقق كل نجاح و كل هدف أنت بتحلم بيه، ممكن يكون في حد بيساعدك على تحقيق هدفك لكن الشخص ده مجرد عامل مساعد محفز ليك مش أكتر من كدة.
- أنت العامل الأساسي ... التغيير و النجاح مطلوب في حياة كل شخص و أول ما تنجح و تحقق هدفك تخيل أد إيه فرحتك بإنجازك و بتحقيق حلمك.
- لو أنت حققت نجاح كبير السنة اللي فاتت و كمان خططت لتحقيق هدف و حلم في السنة الجديدة فأنت مثابر و شخص طموح و تستحق النجاح في كل خطوة.
لو محققتش أهدافك في السنة اللي فاتت فكن على يقين و ثقة بالله إنك هتحققها في السنة الجديدة ... اسعى أنت بالنصايح اللي هنقولها لك و إن شاء الله هتحقق أحلامك كلها:
1- قيم السنة اللي فاتت من حياتك، اكتب الأهداف اللي حققتها و الأهداف اللي مقدرتش تحققها اكتبها مع قائمة اهداف السنة الجديدة.
2- خلي أهدافك إنك تنمي من ذاتك، تطور مهاراتك و تزود خبراتك.
3- اسأل نفسك أنت عايز تحقق إيه بالظبط و خليك صادق و واقعي في الإجابة.
4- إلتزم بلأهداف دي و ابدأ في العمل على الوصول إليها فورا.
الخطوات اللي هتسهلك الوصول لأهدافك:
1- بلاش استسلام ... خليك واثق في ربنا مهما سمعت عن قصص فشل متستسلمش الفشل مش حالة و لكنه تجربة هتتعلم منها.
2- اكتب أهدافك و أرسم خطط عشان تنفذها و خليها دايما قصاد عينيك.
3- نظم وقتك تنظيم سليم.
4- حدد أولوياتك و دى أهم نقطة.
5- خليك حريص على التنويع و التجديد بمعنى طور من مهاراتك، جدد من نمط حياتك عشان متزهقش و تبقى دايما نشيط و أفكارك متجددة.
6- دور على حد عندة خبرة كبيرة في الحياه و أطلب نصيحتة و مشورته ده هيقلل نسبة الوقوع في الغلط سواء من قرارات أو إختيارات.
و أخيرا:
جون ديو: أن الشخص الجيد هو الذي يسعى لكي يصبح أفضل مما هو عليه حتي ولو كان قليل الشان فيما مضي.
رالف والدو اميرسون: :إن العالم بأسرة يفسح الطريق للشخص الذى يعرف وجهته .. فاعرف أنت وجهتك من الآن ... وابدأ سنة جديدة وانطلق.