-إزاااااي تكون شخص مُختلف في السنة الجديدة ؟؟؟
- يعني إيه شخص مُختلف ؟؟ مش معناها إنك تكون بتتشقلب في مكانك يعنى ولا بتلبس لبس غريب .
- مُختلف بمعني "نفسك" بمعنى أنت" ماهو اللي أنت متعرفوش إن أنت مُختلف ! بس للأسف في خلال حياتنا إحنا بنقلد الناس و مبنكونش شخصياتنا .. بنشوف الحاجة اللي "الناس" موهوبة فيها و نحاول تقلدها عشان نكون زيهم !
- مع أن ربنا خلقنا بمواهب جوانا أصلاً !
- لو دورنا علي صفاتنا و مواهبنا و شخصيتنا الحقيقية ومسكنا فيهم هنكون مُختلفين .. هنكون نفسنا.
نعمل اية بقي عشان نكون نفسنا ؟؟
1- زي ما قولنا .. اتأكد إنك مختلف .. فريد من نوعك .. فيك حاجات مش موجودة في أي حد، دي حاجة لازم تكون مؤمن بيها قبل أي حاجة .
2- اتكلم مع نفسك أعرف نفسك و شوف نفسك عاوزة إيه و حاول تعمله .. من الأخر خليك مع نفسك.
3- أعرف أنت عاوز تكون "مُختلف" من أنهي ناحية ؟؟ عاوز تكون مثقف ؟ عاوز تكون رياضي ؟ عاوز تكون سياسي ؟ عاوز تكون فنان ؟ عاوز تكون قارئ عاوز تكون كاتب ! اعرف عاوز تكون مُختلف عن الناس في إيه بالظبط .
4- أعرف إيه حواليك و في بيئتك هيساعدك تكون مُختلف ... إيه الموارد اللي عندك .. إيه الحاجة الزيادة اللي عندك و مش عند غيرك اللي هتخليك متميز.
5- راقب الناس حواليك ... شوف بيعملوا إيه ... بيعملوا غيه يخليهم سيئين .. بيعملوا إيه يخليهم كويسين .. بيعملوا إيه يخليهم ناجحين .. و هكذا .. أعرف موارد الناس و استخدمها لنفسك .. دي حاجة هتساعدك جداً .
6- حاجة أساسية جداً و هي إنك تعمل الحاجة اللي أنت بتحبها .... لو لقيت كل حاجة حواليك بتشجعك تكون رياضي ... بيئتك و عيلتك و مواردك .. بس أنت مبتحبش الرياضة يبقي بلاش ! .. أنت مش هتكون مختلف غير لما تعمل الحاجة اللي بتحبها .. مش هتكون مختلف غير لما تكون نفسك.
7- جرب حاجات جديدة كتير عشان تدي نفسك فرص إنك تلاقي حاجة تبدع فيها و تكون مختلف بيها.
8- بلاش يكون ليك أعداء ... عامل كُل الناس بشكل كويس و محترم حتي لو مش بتحب الشخص دة ... لأنك لو عملت كدة في الزمن ده هتكون مختلف فعلاً.
9- إلبس حلو إنك تاخد بالك من شكلك و مظهرك دي حاجة مهمة جداً ... الناس بتشوف شكلك قبل ما بتشوف شخصيتك و بتعلق معاهم . فحاول تكسب النقطة دي.
10- صدق من جوا إنك متميز ... هتلاقي باين عليك من برة إنك متميز.