انت شغال ايه ؟
Software developer
ايوه يعني بتعمل إيه؟
مفيش حد فينا متسألش السؤال ده إن حد يقولك بتشتغل عليه فترد عليه بألغاز أو اختصارات، يقولك اه يعني بتعمل إيه! و طبعا تبتدي رحلة الزهق والتوهان موال بقى علشان تفهم اللي قدامك شغلك إيه !!
١. IT
.png)
عالميا: ده شخص مسؤول عن جميع الأجهزة اللي ليها علاقة بالتكنولوجيا في أي شركة أو مؤسسة أو كلية أو أي منظمة كبيرة.
في ام الدنيا: بيسطب ويندوز و يصلح الماوس والكيبورد.
و المشكلة إن الراجل ده مهندس زيه زي أي خريج هندسة بس متعرفش عشان هو مثلا كليته كانت ٤ سنين مش ٥ فالناس قررت تعاقبه لحد ما يكفر عن السنة دي بأي شكل
٢. Graphic Designer
عالميا: الراجل ده بيعمل حاجات كتير أوي من أول الصور و لو ربنا كرمه و اجتهد وخد كورسات، بس مش في المركز الثقافي الروسي أبو تخفيضات طول السنة دي، ممكن يبقي حاجة كبيرة أوي في مجالات كتير
في ام الدنيا: فنان التركيب ومتخصص دلع الصور، يعني بالنسبة لناس كتير هو كل اللي بيعمله انه يركب صورتين علي بعض و برضو متعرفش الناس بتعاقبه مثلا عشان هو مش خريج كلية معينة، والموضوع كله موهبة وانه اتعلم واجتهد، بل وصل الامر ان فيه ناس بقت تطلب ناس بتوع فوتوشوب و يقولك "مطلوب صنايعي فوتوشوب"
٣. مهندس اتصالات / Communication Engineer
عالميا: مهندس الاتصالات علي مستوى العالم بيعمل حاجات كتير ومفيش حاجة اسمها مهندس اتصالات و بس، لان المجال ده تحتيه كذا حاجة و كل مهندس بيشتغل في جزء معين و بيبقي ليه شغل محدد بيعمله
في ام الدنيا: بتفهم في الموبايلات؟ اصل الواتس عندي مش شغال مش عارف ليه؟
طبعا هنا كل المهندسين بيتسف عليهم بس اتصالات بالذات بقي ليه نصيب الاسد، خصوصا بعد انتشار الموبايلات ولازم في أي تجمع وخصوصا لو عائلي اول ما حد يعرف انك مهندس اتصالات لازم يرميلك الموبايل او التابلت ويطلعلك أي مشكلة فيه وحتي لو سليم يقولك طب بصلي عليه حلو ولا وانا تحديدا مش عارف ايه هي المواصفات اللي نقدر بيها نحدد حلاوة و جمال الموبايل او التابلت تحديدا.
٤. مدرب الجيم / Gym Trainer
عالميا: ده راجل لاعيب و فاهم شغله و بيحدد التمرينات المناسبة لكل شخص علي أساس حاجات كتير زي الوزن و الاكل و الغرض من اللعبة و خلافه
في ام الدنيا: واحد منفوخ و عضلاته كبيرة جدا خصوصا الجزء الفوقاني من جسمه و الباقي مش مهم و أغلب الوقت عمال يبص في المراية على عضلاته.
الفكرة ان عشان تبقي حضرتك شخص زي ده لازم تكون فاهم انت بتعمل ايه و قاري كتير و ساعات ناس بتبقي دارسة لكن هنا الاغلب للاسف بقي بيقولك علي مكملات غذائية او أي باودر او اماينو و انت ثقة في الشخص ده بتعمل كل اللي بيقول عليه لحد ما تلاقي نفسك فجأة جسمك كله "فسا" زي البالونة أول ما تشيل ايدك من عليها.
٥.ناشط اجتماعي/حقوق الانسان Social activist/Human Rights
عالميا: ده شخص دارس و مهمته انه قاعد بيعمل احصائيات عن حاجات كتير ليها علاقة بحقوق الانسان.
في ام الدنيا: بيلم تبرعات و قاعد ينظر علي خلق الله طول الوقت.
المشكلة ان ناس كتير بتاخد المجال ده سكة سهلة للشهرة و عشان يبقوا هما اغنيا فيما بعد، بالرغم من ان فيه كفاءات كتير في المجال ده عندنا ومش مشهورين ومش عايزين يتشهروا لانهم فعلا مؤمنين فعلا باللي بيعملوا لكن الاغلب للاسف بياخد المنظمات الدولية كطريقة انه يعمل فلوس ومتوقع ان سيول الدولارات هاتخر عليه في لحظات
٦. مدير أي قطاع Account Manager/Project Manager
عالميا: ده مسؤل عن جزء معين في شركة وعن الموظفين اللي تحتيه آو عن مشروع معين جوه الشركة و هو المدير من الالف إلي الياء.
في ام الدنيا: قاعد بيبعت ايميلات و يغتت علي الموظفين بسبب أو من غير سبب.
الاعتقاد الاول و الاخير انه في الاول و الاخر موظف، بالرغم ان فيه منهم بيبقي مسؤل عن مشروع معين وأول ما يخلص بيتكل على الله، لكن برضو لا هو موظف وقاعد يغتت و السلام و مهما تتكلم هايفضل موظف وكأن موظف دي شتيمه.
٧. مهندس ديكور/ Interior designer
عالميا: ده راجل بيجي يشوف المكان و تقسيمه و الغرض منه إيه و على أساسه بيحدد الشكل النهائي اللي يكون عليه هذا المكان وبيكون في الاغلب مهندس و لكن حسه الفني عالي شوية.
في ام الدنيا: "بتاع تشطيبات يعني"، لا بتاع تشطيبات ده راجل بيرسم و يحدد و يختار ألوان وديكورات و مليون حاجة و طبعا تحتيه صنايعية وعمال بينفذوا ده كله بس برضو لا طالما بيتعامل في أي حاجة فيها دهانات أو بويه يبقي بتاع تشطيبات بل بيوصل للامر انك ممكن تقوله تعالى قولي إيه لون الملاية المناسبة للسرير بتاعي.
٨. سائق الاختبار/Test Driver
عالميا: الراجل ده قصة وموال وحدوتة بل ان فيه شركات عربيات بتكرم الناس دي بعد ما يعتزلوا المهنة ويعملوا موديلات عربيات مخصوص عليها اسمهم.
في ام الدنيا: دوس بس سنة دبرياش كده هتلاقيها نعمت معاك في المشي/شخص طالع بيك فسحة بالعربية قبل ما تشتريها الراجل ده بيبقى مش مجرد واحد بيسوق و السلام لا ده بيبقي فاهم كل جزء في العربية بل انه ساعات بيبقى فاهمها أكتر من اللي صممها شخصيا وهو سايق بتبقى ودانه و عينه و ايده و عقله كله مركز مع العربية عشان لو لاحظ أي حاجة فيها يلحق يعمل بيها ريبورت قبل ما تتباع أو تنزل السوق.
٩. مرشد سياحي / Tour Guide
عالميا: ده شخص محترم كده و متخرج و دارس و فاهم تاريخ و قاري و مهمته انه يشرحلك كل معلومة عن الجزء اللي انت بتزوره في البلد
في ام الدنيا: بيودي السياح الاهرامات و يروح يسهر و يرقص معاهم و يقعدهم علي القهوة.
المرشد السياحي للاسف سمعته هنا اتدهورت خالص خالص، بل وصل الامر ان بقي فيه اعتقاد عند ناس كتير انه بيقلب السياح دول قبل ما يسافروا و انه مقضيها سهر و سكر و رقص بس معاهم.
١٠. الامن /Security
عاليما: ده ممثل أو بديل للشرطة في العمارة أو المنع أو الشركة أو أي مبنى.
في ام الدنيا: شغلانة الي مالوش شغلانة
الراجل ده في مصر بقي بالظبط راجل عجوز قاعد بيسمع الراديو و يمنع الموظفين من شرب السجاير على السلم او شاب مشترك في باقة انترنيت و عمال يلعب و يشات طول الليل مع صاحبته بس ده ساعات بيخلي الموظفين يشربوا سجاير علي السلم
المصدر www.theglocal.com