حبر للطابعات hp samsung canon brother

أسباب تخلي أصحاب ينفضوا للسي في بتاعتك

 أسباب تخلي أصحاب ينفضوا للسي في بتاعتك
تم النشر بواسطة : ewazefa.com
المشاهدات :4173

10 أسباب تخلي أصحاب العمل ينفضوا للسي في بتاعتك

 

1- لسه بتستخدم إيميل هوتميل أو ياهو؟
 

أي حد عايز يشتغل لازم يبقي شايف المستقبل ويخرج من العيشة في الماضي، إلا لو إنتا بتقدم علي وظيفة مؤرخ لفترة التسعينيات، ياريت تبتدي تفكر جدياً إنك تنقل إيميلك علي جي ميل.


طبعاً لو مقدم من إيميل علي دومين بإسمك هتفرق كتير لإنها بتدي إنطباع مبدئي كويس عن مدي معرفتك وإستخدامك للإنترنت.


 

2- مش لاقيك علي جوجل
 

مش لازم تبقي ستيف جوبز أو مايكل جاكسون، بس لازم تبقي ظاهر بما فيه الكفاية علي الإنترنت بطريقة تخليني أعرف ألاقي بسهولة بروفايل لينكيد إن، حاجة إنتا كاتبها، فيسبوك، تويتر أو الويب سايت بتاعك بمجرد ما أكتب إسمك في جوجل.

 

3- آخر تويتة ليك من 2011
 

متقوليش إنك تنين ماركتنج و لا مبرمج و لا جرافيك ديزاينر ومكتبتبش ولا تويتة من 3 سنين، مش لازم يكون عندك مليون فولور (بالرغم من إني هركز معاك أكتر لو عندك)، بس لازم يكون ليك تواجد، بتخش في مناقشات وبتريتويت.


كام تويتة كل أسبوع كفاية وغيابك لشهور مش مقبول، أحسنلي إني أشوفك مستخدم سوشيال ميديا أكاونت كويس عن إني أشوفك إن عندك أكاونت في كل حتة ومش بتستخدم ولا واحد فيهم.


 

4- خاربها في صور فيس بوك البابليك
 

صورتك بالمايوه في الساحل أو وإنتا سهران في الكافيه مع صحابك حلوة بس مفيش أي مبرر إنهم يبقو بابليك، صورك بالمايوه ملهاش مكان في وسط الصور البابليك اللي أي حد ييجي يتفرج علي بروفايلك يشوفها، إلا لو إنتا مقدم علي شغلانة موديلز أو غطاس في المجاري :).

 

5- صورتك علي لينكيد إن سيلفي
 

لينكيد إن هي بروفيشينال نتوورك وبس. من حقي إني ألاقي صورتك هناك صورة رسمية إلي حد ما، ده مش معناه إنك تروح تتصور في إستوديو مخصوص، بس لازم تبقي باصص للكاميرا، وشك كله باين وبلاش فلاتر إنستجرام الله يكرمك.

 

6- الرقم الوحيد في السي في بتاعتك هوا رقم تليفونك
 

الماركتنج مش بس كرياتيفيتي، محتاج تبين إنتا إزاي كنت ناجح في شغلك، يعني لو مش متكلم علي بعض إنجازاتك أو الأكاونتس الناجحة اللي إشتغلت عليها مش هتلاقي لنفسك مكان في الماركتنج النهاردة.

 

7- واخد الكلام لوحدك
 

كلمني عن نفسك بطريقة واضحة، إختصر وقلل من الرغي. محدش عايز يقرا عن “قدراتك المازوخية في قيادة فريق العمل لتحقيق أهداف السوق وتحقيق النجاح التنيني” إكتبلي عن أكاونتات إشتغلت عليها، حاجات بعتها وزباين البيزنيس بتاعهم كبر علي إيدك.

 

8- مبتكتبش أي حاجة
 

في حاجات كتير علي الإنترنت تقدر تتكلم فيها عن شغلك، سواء كتبت علي لينكيد إن، فيسبوك أو عندك بلوج، لازم يكون عندك القدرة علي عرض شغلك علي الإنترنت.

 

9- قدمت علي 20 شغلانة عندنا في الشركة
 

كونك نفسك تشتغل في شركة معينة في السوق دي حاجة كويسة، لكن كونك مش مركز دي حاجة مش كويسة، وفر وقتك ومجهودك في كتابة كفر ليتر و تعديل السي في بتاعتك عشان يبقو متفصلين علي الشغلانة بدل متقعد تعمل قصف عشوائي لإنبوكس التوظيف علي أي شغلانة تحطها الشركة اللي نفسك تشتغل فيها في السوق سواء مناسبة لمهاراتك أو لأ.


مش عارف أنهي شغلانة مناسبة أكتر لإمكانياتك؟ جرب تبعت لقسم التوظيف تسألهم يمكن تعجبهم الحركة دي ويركزو معاك أكتر.


 

10- نسيت تستخدم Ctrl + F
 

الغلطات الإملائية غير مقبولة، واللي مش مقبول أكتر منها إنك تبعت كوفر ليتر لشركة كنت باعته لشركة تانية في السوق ونسيت تغير بعض الحاجات المتعلقة بالشركة التانية، ده مش معناه إنك محتاج 500 كوفر ليتر لكل شركة في السوق وكل وظيفة بتقدم عليها، بس حاول علي قد ماتقدر إنك تخلي الكلام عام ومش مرتبط بإسم المكان ومتنساش دايماً إنك تراجع كويس قبل ما تبعت الإيميل عشان وقتك ميضيعش هدر.

 

البحث عن وظيفة كويسة صعب، متخليش الموضوع أصعب وتضيع وقتك ومجهودك بسبب شوية غلطات صغيرة تصليحها مش هياخد منك وقت زي العشرة اللي مكتوبين دول. ركز كويس عشان متديش للشركة اللي إنتا باعتلها عذر إنهم يشغلوك من قبل حتي ما يشوفوك، الماركتنج من أكتر الشغلانات اللي بتتطور، خليك متطور زي الشغلانة اللي بتدور عليها.

 

عشان تتابعوا أجدد الوظائف في الماركتينج، جرافيك ديزاينرز، مبرمجين و مهندسين، زوروا موقعنا

www.ewazefa.com

استلم تنبيهات الوظائف عبر البريد

لا تدع الفرصة تمر من دون علمك، استلم كل الوظائف التي تنشر علي الموقع اسبوعيا.
بالضغط علي اشترك فانت قرات و وافقت علي شروط الإستخدام وسياسة الخصوصية.

البحث عن الوظائف

ابحث في آلاف الوظائف الحقيقية و تقدم اليها في خطوة واحدة.
وظائف محامين
وظائف مهندسين
وظائف محاسبين
وظائف كمبيوتر و انترنت