هفضل دايماً فاكر أول يوم ليّا في العمل، لما إشتغلت في جلوبال تكنولوجيز أونلاين (جي.تي.أو)، كان في 2007 وكنت لسة متعين ويب ديفيلوبر، ومكنتش فاهم أي حاجة في الويب :) ، يومها قعدت أتفرج علي الموظفين و المديرين هناك و عرفت إن قدامي في الشركة دي شوية وقت كتير وعلام أكتر.
اليومين دول معظم الناس مبتحبش تقضي حياتها كلها في شركة واحدة، الحقيقة إن متوسط قعاد الموظف في شركة واحدة بقي أقل من خمس سنين، ومن وجهة نظري هوا ده الشكل الي هيستمر عليه الجيل بتاعنا لفترة كبيرة.
عشان كده أنا شايف إن من الحاجات المهمة اللي لازم تبتدي تعملها الشركات إنها تدعم الموظفين أصحاب الأداء الإستثنائي، تعرّفهم كويس تسلسل الترقيات في الشركة، وتساعدهم إنهم يطورو نفسهم عشان يكونو جاهزين لما الشركة تحب تملا مكان إداري.
من واقع خبرتي كشخص خد ترقية و إدّا ترقية قبل كده، في خمس حاجات هتساعدك تطلع سلم الترقية لأعلي ما إمكانياتك توصلك:
1- خليك حلال مشاكل
أحسن المديرين هما اللي بيدورو علي فرص يظهرو فيها مواهبهم و يعملو تغيير حقيقي، إتعود إنك تدور علي المشاكل وتحلها. لما يكون عندك فكرة لعمل حاجة بطريقة أذكي أو أفضل إتكلم! ممكن يكون مديرك مبياخدش رأيك في كل إقتراح، بس مجهودك عمره مهيضيع، لما تعمل كده هتبان إيجابي و عندك مهارات قيادة كويسة.
2- إقبل التاسكات الرزلة
خد المبادرة في الفرص اللي بتيجي في طريقك حتي لو حسيت إنها مكلكعة. مفيش طريقة تخليك تكبر وتتعلم أكتر من إنك تبعد نفسك عن التاسكات المريحة.
لما وصلت للمرحلة اللي بقيت فيها بدير فريق كنت إشتغلت في خمس شركات و إتحركت في مجالين شغل وإتحركت في خمس مسميات وظيفية و عزّلت أنا و أسرتي مرتين عشان أبقي قريب من شغلي. كل ما دخلت تحديات أكتر و كسبتها كل ما الفرص اللي هتجيك أكتر.
3- إظهر إزاي شغلك كان مفيد للشركة
أهم حاجة في العمل هي النتايج، خليك دايماً متابع شغلك و نتايجة ودايماً إكتب الكلام ده وشيله عندك. لما تقعد مع مديرك إشرحله التأثير اللي إنتا عملته علي مكسب الشركة، تقليل النفقات، حسّنت العمليات أو كسّبت الشركة زباين جداد.
إنت مش بتعمل كده من باب الفخر أو بتجبّي عي الشركة، إنتا بتظهر إنك فاهم أهداف الشركة و إنك بتشتغل بأقصي جهدك عشان تحققها، لو عملت كده هيبقي عندك أفضلية كبيرة ما ييجي وقت ترقيات في الشركة.
4- إفهم قيم ومواصفات الإدارة في شركتك
إظهر للإدارة إنك فاهم كويس إيه الحاجات اللي هما بيقدّروها في المديرين وبيدورو عليها و حاول دايماً تظهر إنك عندك القيم دي، بعض الشركات مثلاً بتدور علي المديرين اللي بيحافظو علي هدوء أعصابهم و مستواهم ثابت تحت أي ضغط شغل،
بعض الشركات يهمها المديرين اللي عندهم رؤية مستقبلية وشايفين الشركة بتتحرك لفين الفترة الجاية، بعض الشركات بتحب المديرين اللي بيقدرو يبنو علاقات ناجحة مع الموظفين، بعض الشركات بتدور علي المديرين اللي بيقدرو يحفزو و يلهمو زمايلهم.
5- خليك دايماً عارف إن النجاح رياضة جماعية مش فردية
في نفس الوقت الي إنتا بتحاول تميّز و تظهر نفسك فيه، إفتكر دايماً إن محدش بينجح لوحده، بيّن مهاراتك القيادية بإنك تساعد زمايلك في شغلهم و حاول دايماً تعمل في الشركة بيئة صحية و إيجابية للشغل، إظهر لما زمايلك يحتاجوك، إشكر الناس اللي بتشتغل كويس،
قضّي شوية وقت كويسين في التعرف علي زمايلك، عامل الكل بإحترام، و خليك دايماً عارف إنك كل ما خدت بالك من اللي حواليك أكتر كل ما هما هياخدو بالهم منك أكتر.
أصحاب الشركات و المديرين بيقضو وقت كبير في تطوير المواهب، عمل خطط لنقل العمل منهم للتيم، تحديد مين جاهز عشان ياخد منصب قيادي، نجاح أي شركة مرتبط بعمل العمليات دي بإستمرار، لو فضلت محافظ علي الخمس حاجات اللي إتكلمت عنهم في المقال ده هتفضل دايماً في قائمة أولويات مديرينك أول ما يتفتح باب الترقيات.
المصدر: http://goo.gl/9jtY2S