المقابلة الغير شخصية

المقابلة الغير شخصية
تم النشر بواسطة : ewazefa.com
المشاهدات :6668




ده انت أدائك Fake أوي :D
 

كل واحد فينا و هو رايح اي انترفيو بيبقى متقمص شخصية الموظف المثالي و انه راجل المهمات الصعبة و المنضبط في مواعيده و اللي عرفك و فقسك يلاقيك محلّف الجيران كلهم يصحوك بدري عشان تلحق ميعاد الانترفيو و مبتلحقش كالعادة و بتلجأ لأصيع حجة في التاريخ و هى إنك بقالك فترة تايه و مش عارف توصل بالرغم ان معاك نمرة الشخص اللي كلمك و حدد معاك ميعاد الانترفيو و ممكن تكلمه عادي تسأل عن المكان مش عيب والله بس هنعتبر ان معكش رصيد بجملة الاداء الfake أهم حاجة اننا بنوصل الانترفيو و عاملين نفسنا سبع رجالة في بعض wink
 

الاداء الFake بيعلى و يحلّو أوي لما تتسئل إيه اللي بيميزك عن أي شخص تاني مقدم على نفس الوظيفة ... هنا بقى كل واحد فينا بيعٌد يقلب في دماغه يمين و شمال يدور على أي صفة كويسة و تعتبر مميزة في نفس ذات الوقت و لضيق الوقت مع ضغط الانترفيو بتقول صفات غير مقنعة ممكن تكون فيك على فكرة بس عشان انت متقمص شخصية غير شخصيتك فمش عارف تعبّر و لا حتى تقنع اللي قدامك ...


طبعا من الصفات اللي كل الشعب المصري ما شاء الله مشترك فيها و اول حاجة بتقولها هى إنك ذكي ما أكيد أنت ذكي و صاحب العمل اكيد بردو عايز يعين شخص ذكي بس الصفة دي بالذات مينفعش توصف انت نفسك بيها لازم اللي حواليك يلمسوا الصفة دي فيك بنفسهم بالتجربة و بعدين هما من نفسهم هيوصفوك بالذكاء، ممكن توصف نفسك بالذكاء لكن بكلمات غير مباشرة زي انك شخص تفكيرك منطقي، بتتعلم بسرعة و انك لو اتحطيط في موقف هتقدر تشوف الصورة كاملة من برة و هتتخذ القرار الصح.

 

تاني صفة بتيجي على بالك و بتقولها انك محبوب يا صلاة النبي انت كدة تقمصت تامر حسني و ان اعد في الانترفيو، محدش بيقول على نفسه محبوب لان اللي قامك ممكن يزنؤك و يقولك قولي أمثلة انك محبوب ونبي هترد عليه بإيه ساعتها هتقولو اصلهم لما بيشوفوني بيسلموا عليا، ممكن توصف نفسك إنك ناجح في الTeam work و انك بتحب تساعد زمايلك، الشخص اللي بيعملك الانترفيو هيفهم من نفسه انك شخص ظريف.
 

تالت صفة غير منطقية بتوصف بيها نفسك و هى انك شخص ناجح كانك بالظبط بتوصف نفسك بانك امور و غني، صفة النجاح دي ليها مقياس مختلف بالنسبالك  و و بانسبة للي بيعملك الانترفيو متحطش نفسك في موقف ان مقياسه يبقى اعلى من مقياس نجاحك هتبقى في نظره فاشل او متأخر، ممكن توصله نفس المعني بانك شخص طموح و حاطط خطة عشان توصل لهدفك و اهم حاجة تتكلم عن مهاراتك اللي انت فعلا شاطر فيها هو في الاول و الاخر عايز يعين شخص عند مهارات و شىء من الخبرة.

 

 رابع صفة و دي بالذات قمة الاداء الFake لو قلتها و هي انك بتشتغل ليل مع نهار و مبتفكرش غير في الشغل و ان حياتك كلها بتدور حوالين الشلن حط في بالك ان المبالغة في اي شيء نتيجتها بتدي الانطباع العكسي على طول و الشخص اللي بيسمع الكلام ده مش عبيط و هيبقى فاهم انك بتترسم عليهن خليك انت صايع بقى و وصله نفس المعنى بكلمات زي انك بتهتم بتفاصيل شغلك، بتركز في شغلك و انك بتشتغل بذمة و نشاط.

 

خامس صفة و الاخيرة و دي كارثة في حد ذاتها و هي ان دمك خفيف و بتحب الضحك عى فكرة دي حاجة كويسة بس في حياتك الخاصة اللي بيعملك الانترفية ياخد فكرة عنك ان انت مهرج و هتيجي الشغل تقلبه سيرك ... الصفة دي لو فيك بجد فانت شخص محظوظ بس ممكن تتكلم عنها باسلوب تاني تقو مثلا انك شخص ايجابي و مش من السهل انك تحبط.

 

عايزين نقول حاجة اخيرة ... الكلام المكتوب ده من واقع خبرة و تجارب كتيير مع الانترفيوهات ان الواحد لو كان له حد ينصحه و يقوله الكلام ده قبل كمية الانترفيوهات اللي مر بيها كان وفر على نفسه احراج و تجارب فاشلة و الاهم كان نجح في اول انترفيو و كان زمانا بنشتغل من اول ما اتخرجنا.

 

حاول تستفيد من الكلام ده عى قد ما تقدر و فيد بيه غيرك جايز توفر على نفسك و على غيرك فرص ضايعة كتير.

 

عشان تقدروا تتابعوا كل الوظائف اللي بتتضاف كل يوم على موقعنا في جميع المجالات 

www.ewazefa.com

استلم تنبيهات الوظائف عبر البريد

لا تدع الفرصة تمر من دون علمك، استلم كل الوظائف التي تنشر علي الموقع اسبوعيا.
بالضغط علي اشترك فانت قرات و وافقت علي شروط الإستخدام وسياسة الخصوصية.

البحث عن الوظائف

ابحث في آلاف الوظائف الحقيقية و تقدم اليها في خطوة واحدة.
وظائف محامين
وظائف مهندسين
وظائف محاسبين
وظائف كمبيوتر و انترنت