الفرق بين الWeb Designer و الWeb Developer و هنرشحلك بعض المواقع والماتريال اللى ممكن تبدأ بيها 


فكرة خطأ ناس كتيير بتقولك انه الويب سهل واى حد ممكن يشتغل فيه وانه البرمجة صعبة ومش اى حد يشتغل فيها , الكلام ده مش مظبوط ..


بمثال بسيط ممكن نعمل موقع بسيط عبارة عن 3 صفحات وهيبقى اسمه موقع وممكن اعمل موقع كبير زى دوبيزل او سوق كوم وده مش اى حد يقدر يعمله وكذلك البرمجة ممكن اعمل برنامج بسيط زى ألة حاسبة أو برنامج قوى زى برامج الشركات الكبيرة اللى بتبقى عاوزه سرعة عالية وأمان بدرجة كبيرة ..


يعنى اللى عاوزك تطلع بيه من كلامى مفيش مجال سهل ومجال صعب كل ماتعب واسعى واحاول اتعلم مع الممارسة هتبقى الدنيا سهلة عليا


 أهمية الويب جت أنه فى الفترة الاخيرة اصبح فى كل بيت كمبيوتر + انترنت والناس اللى فى البيت بتتصفح مئات المواقع عشان تبحث على حاجة أو تتواصل مع الناس أو تدور على وظيفة أو تعرف سعر حاجة أو غيرها ..


اذن انه معدل الناس اللى بتدخل على الانترنت كبير اوى يعنى أنا لو صاحب شركة أو عندى جريدة أو غيره لازم يبقى ليا موقع على الأنترنت واول حاجة هتيجى فى بالى انى اختار واحد يصمملى الموقع ده بشكل كويس .


اول حاجة لازم تعملها عشان تصمم موقع بتروح تقعد مع العميل بتشوفه هو عاوز يعمل موقع عن ايه بالظبط ؟ وايه الحاجات اللى هيحطها فى الموقع ؟ والخدمات اللى هتتقدم ؟ والالوان واللوجو والبنرات وطريقة عرض الموقع ؟


واحاول اقترح عليه برضو اضافات واشوف تصميمات شبيه واخد منها افكار لو كويسة وكل التفاصيل دى بتكتبها فى ورقة اللى أنت عملته اسمه مرحلة التحليل وتجميع البيانات المطلوبة ..


خلاص أنا معايا التفاصيل بقا المفروض ابدأ اشتغل هجيب ورقة وارسم عليها التصميم بشكل مبدائى هشوف هحط اللوجو فين وهيبقى حجمه قد ايه وهحط ايه فى الـ Header المنطقة اللى بتبقى فوق فى الموقع وبيبقى فيها اللوجو والمنيو وهحط الـ Content محتوى الموقع بشكل عامل ازاى بلوكات ولا غيره واشوف الـ Footer الجزء اللى من تحت فى الموقع هحط فيه ايه عشان اشوف انا ماشى صح ولا لا ومشتغلش بشكل عشوائى .. بعد مارسمت الشكل المبدائى ابدا اشتغل واطبق عملى بقا.


فى الحقيقة فيه اكتر من طريقة الاولى فيه ناس بتصمم الموقع على الفوتشوب وبعدين تحوله لـ HTML وده بيبقى فيه لمسات جمالية ودقة فى الالوان اكتر والطريقة التانية ناس بتشتغل HTML علطول وتحط الصور


 هنبدأ نتكلم على الـ Web Designer وظيفته ايه الحاجات اللى لازم يبقى عارفها وغيره ؟ فى الحقيقة مصمم المواقع لازم يبقى فنان بدرجة كبيرة وخياله واسع وبيعرف يختار الألوان بشكل سليم، الراجل ده بتكون وظيفته بالتحديد من اول مقابلة العميل لغاية مايسلم الموقع ستاتك وستاتك يعنى مواقع كامل فيه اللوجو والمنيو اللى فوق ولو فيه ناف بار على اليمين او غيره والكلام اللى مكتوب فيه يعنى الشكل العام بتاع الموقع بس موقع مفيهوش اى حركة هسلمه للراجل اللى اسمه Web Developer طيب الراجل الديزاينر لازم يبقى عارف ايه ؟


اول حاجة لازم يبقى برامج لتصميم وتعديل الصور زى الفوتشوب أواليستريتور وفلاش دول عشان اصمم بيهم الصور ,تانى حاجة لازم ابقى عارف HTML ودى ببساطة العمود الفقرى لاى موقع انترنت فى الدنيا ودى مش لغة برمجة دى لغة هيكلة يعنى باستخدامها عشان احدد كل حته فى الموقع هيبقى مكانها فين وبتتكون من مجموعة تاجات وكمان يبقى عارف CSS ودى لغة المظهر بتاعت الموقع يعنى بعد ماحددت كل حاجة هتبقى فين عاوز اتحكم فى الخصائص بتاعتها لون الخلفية ولون الخط وطريقة عرض المنيو والجمال بتاع الموقع ده هعمله بـ CSS وكمان ابقى عارف شوية JavaScript .. عشان اكتب كود فيه برامج كتيير اشهرها دريم ويفر .. يعنى ببساطة جيت اعمل شقة روحت عملت الاساس والعمدان بـ HTML وجيت اشطب الشقة واعملها النقاشة بـ CSS 


يبقى الديزاينر سلم الموقع لـ Web Developer وهيبدأ يشتغل هو كمان .. طيب ايه وظيفة الديفلوبر ؟ وظيفته باختصار هبرمج الموقع بتاعى ؟ يعنى ازاى برضو ..


يعنى هعمل قاعدة بيانات للموقع عشان الناس اللى بتعمل اكاونتات جديدة على الموقع تبقى البيانات بتاعتهم محفوظة لو حصل ونسى الباسورد هيعمل ريسترت فهيروح يدور فى قاعدة البيانات على اليوزر بتاعه ويغير الباسورد بتاعه .. كمان ممكن اعمل امكانية التعليقات فى الموقع والاعجابات وعدد الزوار واعلى المواضيع مشاهدة وغيرة ..


نفترض انى الموقع اللى ببرمجة ده لبيع منتجات زى سوق دوت كوم يبقى لازم اعمل نظام معين للبيع حاجة زى فورم كده بسجل فيها بيانتى والمعلومات بتاعت السلعة ووسيلة الدفع لو ماستر كارد كل الحاجات دى هتتسجل فى قاعدة البيانات ولازم تتم بشكل سليم وأمان عشان تحافظ على حق العميل وحق صاحب الموقع ..


طيب لو نفترض انى موقع اخبار وبحتاج انزل كل ساعة 60 خبر لو طريقة تقليدية هفضل اعمل صفحة HTML لكل خبر وهى هتاخد منك وقت كبير أوى .. الراجل الديفلوبر حل المشكلة دى بانه عملك حاجة اسمها CMS نظام أدارة محتوى يعنى حاجة زى الورد كده فى طريقة الكتابة بختار حجم الخط ونوع ولونه والازاحة بتاعته واقدر انزل الصور واتحكم فيها بسهوله ومن غير كود واكتب اللى انا عاوزه وانسق براحتى وادوس اضافة يروح الخبر نازل علطول وغيره وغيره بقا من الحاجات اللى شبه دى 


ايه الحاجات اللى لازم ابقى عارفها عشان اكون ويب ديفلوبر 


فيه اكتر من طريق ممكن تمشى فيه عشان تكون ويب ديفلوبر الاساسيات زى HTML ،CSS ،JS ،JQuery .. الطريق الاول انك تتعلم لغة برمجة php مع قاعدة بيانات mysql دى اكتر حاجة مستخدمة فى السوق والطريق التانى تتعلم اى لغة من لغات الدوت نت زى C#asp.net مع قاعدة بيانات SQL Server وده رقم اتنين ف السوق من حيث الاستخدام والطريق التالت Java مع قاعدة بيانات Oracle وفيه اكتر من لغة تانية ممكن اشتغل بيها زى Ruby , Perl , Python مع قاعدة بيانات mysql .. اى كان اللغة اللى هتعلمها واشتغل بيها هقدر اعمل موقع وبرمجة كويسة انت بتشوف اللغة اللى مرتاح ليها ومطلوبة فى السوق ومميزات كل لغة .


فيه حاجة اسمها منصات التدوين زى Joomla ،Drupal ،Xoops ، Wordpress وغيرها دى برامج أدارة محتوى جاهزة زى موقع جاهز بتحكم فيه بسهوله ولذلك دى من اكتر الحاجات المطلوبة فى مجال الـ Freelancing  لسهوله التعامل معاها .


فيه مفهوم اسمه Responsive Design يعنى باختصار ازاى اخلى الموقع بتاعى يتوافق مع كل الشاشات زى PC ، Laptop ، ipad ،tablet ،mobileوغير من الاجهزة وده مطلوب دلوقتى في السوق .


الـ Developer احسن ولا الـ Designer .. مفيش حد احسن من التانى الاتنين بيكملو بعض ولو حد غلط فيهم هيبقى الموقع مش كويس .


مرتب الـ Developer اعلى من الـ Designer غالبا .


ممكن اشتغل اكتر من لغة برمجة ؟ عادى مفيش مشكلة المهم تكون اتقنت الاولى بشكل كويس وبعدين تبدأ فى التانية .. مش تتعلم الاتنين فى نفس الوقت لا طولت ده ولا ده .

 

نيجى لاخر حاجة المصادر اللى ممكن نتعلم منها 



* 6 مستويات من البداية للاحتراف  تصميم بالفوتشوب والتقطيع وتكويد HTML , CSS  -

https://goo.gl/dFAjIs
 

* تعليم HTML , CSS , JS , PHP , MYSQL , JQuery , Joomla 

https://goo.gl/ovNt5e
 

* تعليم HTML , CSS , ASP.NET

https://goo.gl/DSWVSm
 

* اتعلم HTML5 , CSS3 , JS 

https://goo.gl/HzLMsn

أهل نفسك للعمل كمبرمج فى سوق العمل المصرى

http://blog.ewazefa.com/ar/home/Post/694

نصائح للفريلانسر المبتدىء

http://blog.ewazefa.com/ar/home/Post/717

إزاي تتعلم   HTML

http://blog.ewazefa.com/ar/home/Post/709

مميزات وعيوب العمل الحرّ

http://blog.ewazefa.com/ar/home/Post/707

لمتابعة أجدد الوظائف في جميع المجالات زوروا موقعنا 

www.ewazefa.com