إزاي تكون Graphic Designer محترف

يقابلنا كتير مواقف ممكن لو بنفكر بطريقة غلط -تخلينا نتخلى عن طريق كان ممكن هوه يكون مسار حياتنا أو مصدر رزقنا ، في ناس كتير بيقابلهم مشاكل علشان يكونوا مصممين جرافيك ناجحين، الحل في الكلام اللي جاي ده

ما تشتتش نفسك 

أغلب المبتدئين فى مجال الجرافيك بيواجههم مشكلة انه ما بيكنش عارف هوه عايز يدرس ايه  علشان ايه ، حاول تحدد انت عايز ايه ، حاول تركز فى حاجة واحدة  ، دايما اللي بيدخل مجال الجرافيك ده بيضيع وقت كبير بسبب انه عايز يدرس كل البرامج "الحكاية مش انك بتعرف تشتغل على كام برنامج ، الحكاية انت بتعرف تعمل ايه ببرنامج "يعني مش بالكم لا .. بالكيف .

فكتير من المصممين المحترفين ما يعرفوش الا برنامج أو اتنين ، فحاول تحدد هدفك و تركز فى حاجة تكون هيه مهنتك ، هية شغلتك ، أو هيا الحاجة اللى انت محترف فيها .


اوعى تحبط

الفرق بين واحد وصل ، وواحد فشل ، اللي وصل ممكن يكون قابله مشاكل أكتر ، بس عمره ما وقع ولا أصابه إحباط ، علطول و من غير ما يضيع وقت قام ووقف ، أعاد ترتيب أوضاعه ، حدد نقاط ضعفه ، عالجها ، قابلته مشاكل جديدة في البرامج اللي بيشتغل بيها ، في الشغل ، في الماديات ،ضايقته ، حس بالإحباط لفترة ، ( اعتمد علي الرزاق ذو العرش العظيم ) فقام و  حدد نقاط ضعفه تانى و عالجها و هكذا ……

لو شفت تصميم كويس اوعى تقول " يااااااا هوه انا هعرف اعمل زي ده"

كلنا على فكرة واجهتنا نفس المشاكل ، بس عن تجربة شخصية أنا لما كنت بشوف حاجات زي دي و لسه بشوف و هشوف ، ما بسيبهاش إلا لما بعرف أعمل زيها .

ابحث ، اسأل ، ادرس ، و قبل كل ده توكل على الحي الذي لا يموت ، هتوصـــــل يعني هتوصــــل .

بس خلي بالك ، اوعى تفتكر انك هتوصل لده و انت قاعد ، لازم تتعب ، تحبط شوية و تقوم بسرعة ، و الأهم من ده انك تشتغل ، اعمل اللي انت شايف انه مش كويس هتوصل للكويس ، يعني ازاى هتعمل تصميمات متميزة و انت ما بدأتش ، وانت ما جربتش ، ما حاولتش  …   

حاول و ابحث و اسأل و ادرس .


لازم أكون بعرف ارسم ؟!!!

كمصمم جرافيك مش شرط تكون بتعرف ترسم ، بس على الأقل يكون عندك الحد الأدنى من التذوق الفني ، مصمم الجرافيك هوه الحد اللي بيعرف يجمع ما بين الصور و الرسوم و الكتابات في شكل فني يستخدم لوظيفة معينة ، لكن طبعاً لو بتعرف ترسم ليك مكانك و ليك تميزك في حاجات معينة زي الديجيتال باينتنج ، أو الكراكتر ديزاين .


ازاي اطور نفسي؟

اتفرج علي شغل غيرك ، اوعى تفتكر في لحظة من اللحظات انك خلاص وصلت لمرحلة  بتعمل كل حاجة ، دي  كده اسمها بداية الفشل بعينه .

دايماً دور على الجديد ، شوف الناس بيعملو ايه ، عندك النت ، دور و شوف ، اتفرج على الأفكار ، لو انت فى البداية حاول تتفرج على شغل كتير ، ما تبصش عليه بنظرة إحباط ، بص عليه بنظرة تحدي ، إنا عايز أعمل زى ده ، فى البداية حاول تقلد ، بعد كده هتتفرج بردو بس علشان تطلع بأفكار جديدة ، بدمج أكتر من فكرة ، يعنى خلاص هتنتقل من مرحلة الاقتباس لمرحلة التجديد و الإبداع .

في النهاية طول ما انت بتطور نفسك ، و بتسعى على هدفك معتمدا على مولاك ،ما بتفكرش تعمل حاجة تضر حد . تأكد أن الرحمن وعد ألا يضيع أجر من أحسن عملاً  .

لمتابعة اجدد وظائف مصممين الجرافيكس علي موقعنا

www.ewazefa.com