احنا كنا رغينا كتير عن إزاي نبعت الC.V لHR الشركات ... انهاردة هنرغي تاني في الموضوع ده بس بالأدلة بقي
 

الصورة اللي تحت دي بتوضح كمية الأخطاء اللي بيقع فيها معظمنا لما بنبعت الC.V لشركة ... جايز إحنا بنشوف إنها أخطاء بسيطة و محدش هياخد باله لكنها أخطاء مؤثرة و هتأثر على إنطباع صاحب العمل أو بتاع الHR لما يشوف الC.V و الإيميل بتوعك.

اول حاجة يا معلم لما تيجي تبعت الC.V بتاعك شركة تبعت إيميل جديد عشان كلمة Forward دي متبانش للشخص اللي هيقرا الإيميل بتاعك ... كدة هيفهم إنك زي ما بعتله بعت لغيره هو هو نفس الإيميل بنفس الكلام مكلفتش خطرك حتى تبعت له إيميل جديد
 

تاني حاجة تخللي بالك اوي من الSpelling بتاع الكلام اللي انت كاتبه أصل مش معقول بتبعت إيميل لشركة محترمة بتطلب شغل و طلبك ده مكتوب غلط يعني حتى مختش من وقتك عشان تراجع على اللي أنت كاتبه
 

تالت حاجة اسمك يا بيه اسمك لازم يكون اسمك الحقيقي و كامل من غير أسامي دلع او مختصر و لو كاتب اسم روش يا ريت تغيره لاسمك الحقيقي 
 

رابع حاجة متبعتش الايميل أبيض من الصيني بعد غسيله لازم تكتب Career Objective ظريف يعكس مدى خبرتك و رغبتك في الشغل مع الشركة دي و قد لإيه أنت انسان طموح و عايز تعمل فرق
 

 خامس حاجة و دي أهم حاجة متبعتش ألف إيميل HR في لإيميل واحد انت مش بتوفر ورق مثلا يا ريت كل شركة في إيميل منفصل و لو زنقت معاك أوي استخدم خاصية الBCC دي تقدر تبعت بيها كذا ايميل في نفس الوقت من غير ما حد فيهم يشوف إنك باعت لحد تاني غيره ... خليك ناصح
 

طبعا أنت ممكن تشوف إن النقط اللي فاتت دي ملهاش اي 60 لازمة بس بتأثر جامد
 

هتأثر إزاي ؟ هتأثر إنه هيشوف بالأدلة القاطعة إنك مش شخص بروفيشنال ... مش بتاخد بالك من التفاصيل ... مش مهتم إنك تتميز عن أي حد مقدم على نفس الوظيفة ... مش فارق معاك تشتغل معاه أو مع شركة غيره ... أهم حاجة إنك مش شخص عملي و بالتالي مش هتتحمل المسئولية.
 

هتقولي كل ده من الكام غلطة اللي في الصورة هقولك اه طبعا ... لو انت فاكر إن محدش بياخد باله من الأخطاء البسيطة دي تبقى غلطان ... صاحب العمل او بتاع الHR بيدور على الأخطاء بمكبر ... بيحكم عليك من قبل ما يشوفك من خلال الC.V و الإيميل ... متستهونش لأن ببساطة شديدة في ناس بتهتم اوي بالتفاصيل و هي بتبعت للشركات يعني أنت لو مهتمتش زيهم بالتفاصيل كدة انت شكرا رحت ورا الشمس ... خليك فاكر أنت اللي محتاج الوظيفة و هو ادامه ألف C.V يعني

إحنا مش بنقولك كدة عشان نكلكعها في وشك ... إحنا عايزينك تتميز عن أي حد و نوفر عليك إحباط، مش احيانا بتبعت لشركات كتير بس محدش بيكلمك و بتبقى مش عارف إيه السبب ... النقط اللي اتكلمنا فيها دي من ضمن الأسباب اللي ممكن متخليش حد يهتم بالC.V بتاعك ...
 

فقررنا نخليك أفضل باحث عن وظائف و نساعدك لحد ما الشركات هى اللي تجري وراك عشان تضمك لفريق العمل بتاعها
 

إحنا هنوفر لك نماذج احترافية للC.V تقدر تنزلها و تكتب فيها مؤهلاتك و خبراتك عشان تضمن غن الC.V بتاعك مكتوب باحتراف من اللينك ده
 

http://blog.ewazefa.com/ar/home/Post/436

كنا اتكلمنا عن اهمية الCareer Objective في الايميل نفسه عشان كدة جمعنا لك صيغات مختلفة في لينك و احد
 

http://blog.ewazefa.com/ar/home/Post/633

و طبعا مش معقول اتكلمنا عن إيميلات HR الشركات و مش هنشاركم بإيميلات اجدد الشركات العالمية في مصر
 

http://blog.ewazefa.com/ar/home/Post/645

http://blog.ewazefa.com/ar/home/Post/640

ابتدوا بقي طبقوا النقط اللي اتكلمنا فيها و ربنا يوفقكم إن شاء الله