أول يوم شغل
قلقان من أول يوم ليك في الشغل 
متقلقش إحنا معاك و هنساعدك تخلي اول يوم شغل ليك بداية لمستقبل كله نجاح ...
- خليك مستعد بمعنى حاول تعرف كل حاجة عن الشركة اللي هتشتغل فيها سواء خدماتها، منتاجاتها، ثقافتها و أهم حاجة منافسينها ... متكسلش عن الخطوة دي لان معرفتك بالمعلومات دي هتسهل عليك قرارات و اختيارات كتير في شغلك.
- دايما حافظ على مواعيد شغلك بلاش تمشي بمبدأ محدش هياخد باله، العين هتبقى عليك في الاأول عشان يقيموك، ابدا يوم شغلك في ميعاده ... حفاظك على مواعيدك بيعكس مدى تحملك للمسئولية قدام مديرينك.
- لو معرفتش تعمل حاجة في شغلك اسأل .. لو مفهمتش حاجة في الTask اللي قدامك اسأل ... لو اتشرحلك حاجة و بردو مجمعتش منها حاجة اسأل و متتكسفش ... لما تسأل كتير محدش هيقول عليك غبي لا سمح الله و لا إنك فاشل بالعكس أنت بتسأل عشان شغلك يطلع صح من أول مرة و تقلل نسبة الخطأ على قد ما تقدر.
- أول فترة من شغلك خليك مستمع جيد كل حاجة بتتقلك من نصايح، تعليمات و معلومات تسجلها و تفهمها كويس ... أنت محتاج كل نصيحة و معلومة هيفيدوك اوي في شغلك و في أي مشكلة هتواجهك.
- بلاش تعد في أعدات النميمة دي اللي بتبقى في كل شركة ... ممكن تاخد فكرة غلط عن حد و ده هينعكس على معاملتك ليه و بالتالي على شغلكم سوا ... استغل وقتك في إنك تتعلم حاجة مفيدة ليها علاقة بشغلك.
- خليك إيجابي في شغلك ... حاول متشتكيش من حد من زملائك حتى لو أنت مش مرتاح في شغلك معاه، حاول تتكيف مع أسلوبه لمصلحة شغلك و كمان متشتكيش من حاجة في شغلك لو واجهتك مشكلة ما اتحدى نفسك إنك تحلها.
دي شوية نصايح كدة ركز فيهم هينفعوك في أول يوم شغل ليك و كمان قوول دعاء التوفيق في العمل هيريحك أوي 
"اللهم اني اسالك خير ما آتي، و خير ما افعل، وخير ما اعمل، و خير ما بطن و خير ما ظهر، و الدرجات العلى من الجنة" آمين.