طبعاً كمبرمجين خاصة وإحنا لسه في أول وظيفة لينا، أول حاجه بنعملها أول ما ناخد الAssignment أو Project إننا نكتب الكود على طول..واتفرجوا بقى على الاسباغيتي وكمية الBugs وبعد ماتلاقيك كاتب ييجي 1000 سطر كود يضرب عند التسليم
ولو حاولت ترجعله تاني عشان تعدله تقلب منصور ابن الناظر في مدرسة المشاغبين "هوه إنت قولت إيه إنت ؟ ولا عملت إيه إنت ؟ ولا عملولك إيه إنت؟ "
دي 10 خطوات عشان تحسن مهاراتك كمبرمج وتتفادى المشاكل دي شوية:
1- حلّل المشكلة في ال(Project/Assignment) بوضوح
2- فكر مرتين في إزاي هتحل المشكلة دي
3- خد وقتك في تجميع المتطلبات Requirements وكتابتها وحدد الأهداف اللي المفروض البرنامج يحققها ومين اللي هيستخدم البرنامج ده.وضوح الأفكار في المرحلة دي هيوفر وقت كتير بعد كده.
4- اكتب خطة تنفيذ شاملة.
لو البرنامج صغير ممكن تستخدم Flowchart .
لو البرنامج كبير حاول تقسمه لوحدات Modules وحدد كل وِحدة هتعمل إيه بالتحديد ، وإزاي الوحدات هتبعت لبعض Data وإزاي الData هتُستخدم داخل كل وحدة.
بالرغم إن تجميع وكتابة المتطلبات Requirements و عملية التخطيط ممكن تبقى مملة وتاخد وقت بس وقت تصحيح الBugs ممل أكتر.
5- اكتب تعليقات Comments على الكود بتاعك. لو حاسس إن الكود بتاعك محتاج توضيح، اكتب تعليق جنبه. المفروض إن كل Function/Method يتكتب قبلها سطر أو سطرين يتوصف فيهم الحاجات اللي بتاخدها Arguments والمفروض ترجع إيه Return. وماتنساش لما تعدل الكود عدّل التعليقات.
6- لما تسمّي المتغيرات Variables سميهم بطريقة واضحه بحيث إن نوعها Types والهدف منها يبقوا واضحين من إسمها.
7- نظم الكود بتاعك. استخدم مؤشرات تبيّنلك هيكل الكود. حاول تسيب مسافات مابين المتغيرات Variables والعمليات الحسابية اللي بينها. المهم تخلي الكود منظم وواضح وسهل أي حد يقرأه.
8- اختبر Test كل وحدة في الكود لوحدها باستخدام المدخلات وشوف النتايج اللي هتطلع هيه اللي انت عايزها ولا لأ.وبعدين جرب كل المدخلات الممكنه، في فن في موضوع الاختبار Testing حاول تتعلمه.ومن الفن ده إنك تجرب مدخلات متناقضه زي مثلا كلمة فاضية لو النوع string ، و صفر للأرقام. وإنك تجرب مدخلات ملهاش معنى حتى لو مش متخيل إن المستخدم ممكن يدخلها.وكمان جرب مدخلات غلط يعني مثلا 0 في عملية قسمة أو رقم سالب في عملية لازم تبقى مدخلاتها موجبة..وهكذا.
9- ابدأ بالحجات البسيطة وزبطها كويس وبعدين انقل للحجات الأصعب والمعقدة أكتر.
10- خليك مستعد دايماً للتغيير.التغيير أساسي عشان كده كل ما كان التحليل والتخطيط في الأول واضح كل ما كان التغيير أسهل.